વલસાડના ગુંદલાવ ઓવરબ્રિજથી એસપી પેટ્રોલ પંપ સુધીના સર્વિસ રોડની હાલત જોઈને પ્રશ્ન થાય કે આ રોડ પ્રજાની સુવિધા માટે બન્યો છે કે કોન્ટ્રાક્ટરના ખિસ્સા ભરવા માટે? છેલ્લા ૩ વર્ષથી ખાડા રાજ ભોગવી રહેલી જનતાને આશા હતી કે નવો રોડ બનશે, પરંતુ જે રોડ બની રહ્યો છે તે ભ્રષ્ટાચારનો જીવતો જાગતો પુરાવો બની ગયો છે.
હાથથી ઉખડી રહ્યો છે ડામર: કેવું મટીરીયલ વપરાયું?
ચોંકાવનારી બાબત તો એ છે કે નવો બની રહેલો રોડ મજબૂતીના નામે મીંડું સાબિત થયો છે. સ્થાનિકો અને મીડિયા દ્વારા જ્યારે તપાસ કરવામાં આવી ત્યારે ડામરનું પડ માત્ર હાથથી જ ઉખડી રહ્યું હતું. કોઈ પણ રોડ બનાવતા પહેલા ધૂળ સાફ કરવાની પાયાની પ્રક્રિયા પણ કરવામાં આવી નથી. ધૂળ પર જ ડામર પાથરી દઈને માત્ર ‘વેઠ’ ઉતારવાનું કામ થયું હોય તેવું સ્પષ્ટ દેખાય છે.
કોન્ટ્રાક્ટરની કબૂલાત: “રોડ નહીં ટકે”
રિપોર્ટિંગ દરમિયાન જ્યારે કામ કરી રહેલા કોન્ટ્રાક્ટરને સવાલ પૂછવામાં આવ્યો કે “શું આ રોડ ટકશે?”, ત્યારે તેણે પોતે સ્વીકાર્યું હતું કે આ રોડ કોઈ પણ સંજોગોમાં ટકવાનો નથી. જ્યારે બનાવનાર પોતે જ રોડની ગુણવત્તા પર સવાલ ઉઠાવતો હોય, ત્યારે તંત્રના એન્જિનિયરો અને સુપરવાઈઝરો શું કરી રહ્યા છે?
મુખ્ય મુદ્દાઓ જે તંત્ર સામે સવાલ ઉઠાવે છે:
૩ વર્ષની રાહનું પરિણામ શું?: વારંવારની રજૂઆતો, અકસ્માતો અને લોકોના મૃત્યુ બાદ જ્યારે કામ શરૂ થયું, ત્યારે તે માત્ર દેખાડો જ કેમ?
ચૂંટણીલક્ષી ‘લોલીપોપ’?: શું ચૂંટણી નજીક હોવાથી ઉતાવળે કામ પતાવીને જનતાની આંખમાં ધૂળ નાખવાનો પ્રયાસ થઈ રહ્યો છે?
ટેક્સના પૈસાનો વેડફાટ: લોકોના પરસેવાની કમાણીના ટેક્સના પૈસાથી બનતા રોડ જો ૪ મહિનામાં તૂટી જવાના હોય, તો જવાબદાર અધિકારીઓ પર કાર્યવાહી ક્યારે થશે?
નિષ્કર્ષ:
સ્થાનિકોનો રોષ એવો છે કે જો આ મટીરીયલનું લેબોરેટરી ટેસ્ટિંગ કરવામાં આવે, તો તે ૧૦૦% ફેલ જશે. અત્યારે તો એવું લાગે છે કે આ રોડ માત્ર ૪ મહિનાનો જ મહેમાન છે. શું તંત્ર આ ભ્રષ્ટાચારની તપાસ કરાવશે કે પછી જનતા ફરીથી એ જ ખાડાઓમાં પડવા માટે મજબૂર બનશે?
નિલેશ પટેલ
GJ દેશી ન્યુઝ, વલસાડ
