(ડાંગ માહિતી બ્યુરો): આહવા: તા: ૧૯ : સમગ્ર રાજ્ય સહિત જિલ્લામાં આગામી તા.૨૭ ફેબ્રુઆરી થી ધો.૧૦ અને ૧૨ની પરીક્ષાનો પ્રારંભ થનાર છે. બોર્ડની પરીક્ષાની પૂર્વ તૈયારીના ભાગરૂપે સ્થાનિક સબંધિત અધિકારીશ્રીઓને માર્ગદર્શન આપવા શિક્ષણ મંત્રીશ્રી કુબેરભાઇ ડીંડોરની અધ્યક્ષતા અને રાજ્ય કક્ષાનામંત્રીશ્રી પ્રફુલ પાનશેરીયા તથા શિક્ષણ વિભાગના અગ્ર સચિવ મુકેશકુમારની વર્ચુઅલ ઉપસ્થિતિમાં વિડીયો કોન્ફરન્સ ડાંગ કલેક્ટર કચેરી ખાતે યોજાઈ હતી.
આગામી તા.૨૭/૦૨/૨૦૨૫ થી બોર્ડની ધોરણ-૧૦ અને ધોરણ-૧૨ સામાન્ય પ્રવાહ અને વિજ્ઞાન પ્રવાહના ઉમેદવારોની પરીક્ષાઓ શરૂ થનાર છે. સમગ્ર રાજ્યમાં મુક્ત, ન્યાયી અને તણાવ મુક્ત વાતાવરણમાં બોર્ડની પરીક્ષા યોજાઇ તે માટે શિક્ષણમંત્રીશ્રી કુબેરભાઈ ડીંડોરે માર્ગદર્શન આપ્યું હતુ.
આ વિડીયો કોન્ફરન્સમાં પરીક્ષા સંબંધે થયેલ તૈયારીની રૂપરેખા, કેન્દ્રોની સંખ્યા, બ્લોક વ્યવસ્થા, તમામ પરીક્ષા સ્થળો ઉપર યોગ્ય સીસીટીવી વ્યવસ્થા અંગેની બાબતોની ચર્ચા કરવામાં આવી હતી. આ સાથે જિલ્લા કક્ષાએ કંટ્રોલરૂમ, સતત વીજપુરવઠો શરૂ રહે તે માટેનું આયોજન, રૂટ પોલીસ ગાર્ડ, ઝોનલ કચેરી/સ્ટ્રોગરૂમ ઉપર પોલીસ બંદોબસ્તની વ્યવસ્થા, પરીક્ષા દરમ્યાન કોઈ વિદ્યાર્થી અથવા પરીક્ષામાં રોકાયેલ અધિકારી/કર્મચારીને જરૂર પડયેથી ફર્સ્ટ એઈડરી વ્યવસ્થા કરવા, ગ્રામ્ય વિસ્તારમાંથી આવતા વિદ્યાર્થીઓ માટે બસ વાહન વ્યવહારની સગવડ કરવા વગેરે બાબતે સમીક્ષા કરવામાં આવી હતી.
ઉલ્લેખનીય છે કે ડાંગ જિલ્લામાં ધોરણ ૧૦ માં કુલ ૧૧ કેન્દ્રોના ૧૪ બિલ્ડીંગના ૧૩૩ બ્લૉક પર ૩૩૭૭ વિદ્યાર્થીઓ પરીક્ષા આપશે. ધોરણ ૧૨ માં સામાન્ય પ્રવાહમાં કુલ ૫ કેન્દ્રોના ૦૭ બિલ્ડિંગના ૬૩ બ્લૉક પર ૧૮૧૨ વિદ્યાર્થીઓ પરીક્ષા આપશે. જયારે ધોરણ ૧૨ ના વિજ્ઞાન પ્રવાહમાં કુલ ૦૨ કેન્દ્રોના ૦૨ બિલ્ડીંગના ૧૭ બ્લૉક પર ૩૨૧ વિદ્યાર્થીઓ પરીક્ષા આપશે. જે કુલ મળી ૧૮ કેન્દ્રોના ૨૩ બિલ્ડીંગના ૨૧૩ બ્લૉક પર ૫૫૧૦ વિદ્યાર્થીઓ પરીક્ષા આપનાર છે.
ડાંગ જિલ્લા કલેક્ટર કચેરી ખાતે યોજાયેલ આ વિડિઓ કોન્ફરન્સમાં જિલ્લા પુરવઠા અધિકારી શ્રી યુ.વી. પટેલ, નાયબ જિલ્લા વિકાસ અધિકારી શ્રી એસ.જી. પાટીલ, આહવા મામલતદાર શ્રી યોગેશ ચૌધરી, જિલ્લા શિક્ષણાધિકારી શ્રી જીગ્નેશ ત્રીવેદી, પ્રાથમિક શિક્ષણાધિકારી શ્રી વિજય દેશમુખ સહિત પરીક્ષા સમિતિના સભ્યો સહિત સબંધિત અધિકારીશ્રીઓ જોડાયા હતાં.
–
