40 ડિગ્રી તાપ માં 4 km પગપાળા ચાલી પહોંચ્યું ગ્રાઉન્ડ ઝીરો પર જી જે દેશી ન્યુઝ
સાદડૂન ગામની વેદના
સોનગઢ તાલુકાના સાદડૂન ગામે વિકાસના દાવાઓ વચ્ચે હકીકત કંઈક અલગ જ નજરે પડે છે. સ્થાનિક સ્વરાજની ચૂંટણી નજીક આવતાં ગામની મૂળભૂત સમસ્યાઓ ફરી એકવાર ચર્ચામાં આવી છે. ‘GJ Desi News’ના વિશેષ અહેવાલમાં ગામની વાસ્તવિક પરિસ્થિતિ ચોંકાવનારી છે.
ગામના ગ્રામજનો આજે પણ મૂળભૂત સુવિધાઓ માટે સંઘર્ષ કરી રહ્યા છે. ખાસ કરીને પીવાના પાણીની સમસ્યા ગંભીર બની ગઈ છે. ગામમાં સરકાર દ્વારા કરોડો રૂપિયાની પાણી યોજના અમલમાં મુકાઈ હોવાના દાવાઓ કરવામાં આવે છે, પરંતુ હકીકતમાં લોકો નદીના પટમાં આવેલા ઝરણામાંથી દૂષિત પાણી પીવા મજબૂર બન્યા છે. જેના કારણે આરોગ્ય પર પણ ગંભીર અસર પડી રહી છે.
ગ્રામજનોનું કહેવું છે કે અનેક વખત રજૂઆતો છતાં કોઈ કાયમી ઉકેલ આવ્યો નથી. મહિલાઓને રોજિંદા જીવનમાં સૌથી વધુ મુશ્કેલી વેઠવી પડે છે, કારણ કે પાણી માટે લાંબા અંતર સુધી જવું પડે છે.
ચૂંટણી નજીક આવતાં હવે ગામના લોકોમાં ભારે આક્રોશ જોવા મળી રહ્યો છે. મતદારોનો સવાલ છે કે શું આ વખતે સ્થાનિક નેતાઓ અને જવાબદાર અધિકારીઓ માત્ર વચનો આપશે કે વાસ્તવમાં ગામની મુલાકાત લઈ સમસ્યાનો ઉકેલ લાવશે?
હાલમાં સાદડૂન ગામ વિકાસથી વંચિત રહીને જાણે આદિમાનવ યુગમાં જીવન જીવવા મજબૂર છે. હવે જોવાનું એ રહેશે કે ચૂંટણી પહેલા આ પ્રશ્નો પર તંત્ર જાગે છે કે નહીં, કે પછી ફરી એકવાર ગ્રામજનોને માત્ર આશ્વાસનોથી સંતોષ માનવો પડશે.
સાઉથ ગુજરાત બ્યુરો નરેશ માળી (અભય જાદુગર)
